دڵی دەگووشرێت و قوڕگی
پڕ لە گریان دەبێت. لە هاتنە دەرەوەیدا و لە ناو ئاپۆڕای رێبوارانی سەر شەقامەکەدا
نیگای دەچەقێتە سەر منداڵێک کە پەلی بە پەلی دایکییەوەیە و تەماشای کارتۆنی پلەیستەیشنەکەی
دەستی جیهان دەکات. دایکەکە بە مەبەستی گۆڕینی سەرنجی منداڵەکەی لەسەر دەستی ئەم
و کەلوپەلەکانی ناو فرۆشگەکە، هەنگاوەکانی خێراتر دەکات و داوا لە منداڵەکەی دەکات
ئاگاداری بەر پێی خۆی بێت.
جیهان لە عەسرێکی زووەوە بۆ وەرگرتنەوەی ئەنجامی ئەو پشکنینی خوێنەی دوو
مانگە بۆ دەرەوەی وڵات نێردراوە لەسەر شەقامی ئۆرزدی وێڵ و سەراسیمە دەسووڕێتەوە.
ئەو شەقامەی دوانیوەڕوان لە هاوشارییەکان و خەڵکی دەرەوەی شار جمەی دێت. کڕیار،
بازاڕکەر، کچان وکوڕانی گەنجی شیکپۆش و دەستفرۆشەکانی سەر شەقامەکە لەگەڵ نەخۆش و
سەردانکەرانی دەرمانخانە، کلینک و نەخۆشخانە ئەهلییەکاندا تێکەڵ دەبن و شەقامەکە
دەکەن بە یەکێک لە شەقامە هەر قەرەباڵغەکانی شار. ئەو سەردەمانێک بە گەنجی لەگەڵ
خوشکەکانی یان هاوڕێکانیدا بۆ کڕینی جلوبەرگ و بابەتی جوانکاری و یان هەندێکجاریش
بۆ خواردنی دۆندرمەیەک یان فالوودەیەک بەم شەقامەدا بە نازەوە پیاسەیان دەکرد و ئەم
هەر نازیشی بەسەر شەقامەکەشدا دەکرد. پاشانیش پێکەوە بە خۆشی و خەندەوە باسی ئەو
گەنجانەیان بۆ یەکتر دەگێڕاوە کە بە حەز و تاسەوە سەرنجیان داون یاخود توانج و
پلار و وشەیان تێگرتوون. بەڵام ئەمڕۆ ئەم بە جۆرێک لەو ئاپۆرایە دابڕاوە و نوقمی
نێو جیهانەکەی خۆیەتی کە هەست بە بەرکەوتنی جارجارەی شانی رێبوارەکانیش ناکات. وەک
ئەوەی بە تەنیا خۆی بەسەر ئەو شەقامەوە بێت و بگرە جاری وا هەیە سەر بە فرۆشگەکاندا
دەکات وەک ئەوەی کەسی تیا نەبێت. ئەم دوانیوەڕۆیە ئەو زۆربەی فرۆشگا و کۆگاکانی ئەم
شەقامە گەڕاوە. بێهوودە سەودای کاڵای جۆراوجۆر دەکات و بە بێ ئەوەی بیانکرێت لە جۆر
و باشی و خراپییان دەکۆڵێتەوە و پرسیار دەکات. بێ ئاگایانە هەندێک فرۆشگەی دووجار
و سێجار بەسەرکردوونەتەوە. هەندێک لە خاوەنفرۆشگەکانی نێو بازاڕە داخراو و بچووکەکانی
سەر شەقامەکەیش لەگەڵ دراوسێ دوکانەکانیاندا لە رێگەی زمانی جەستە، ئاماژەی
رووخسار و دەربڕینی مانادارەوە سەرنجی یەکدی بۆ ئەم را دەکێشن. تیایاندا هەیە نیگای
بەزەیی تێکەڵ بە بێزاری تێ دەگرێت پێیانوایە بە دەست کێشەیەکی قورسەوە دەناڵێنێت.
هەشیانە زۆڵانە خەیاڵیان بۆ دوورتر دەڕوات و لە بیری ئەوەدان چۆن بیخەنە داوەوە.
خۆ راستە ئەو لە چلەکانی تەمەنیدایە و لە سکوزایش چۆتەوە، بەڵام هێشتا ژنێکە تەڕتەڕە
بە ژیان. ئەگەر دەستێک بە خۆیدا بهێنێت، وەکو جاران کە دەیکرد ئەوا بەرامبەرەکەی
ناچار بە لێوردبوونەوە دەکات و حەزی دامەزراندنی باسوخواسێکی ئامانجداری تیادا دەورووژێنێت.
جیهان سەردەمانێک گەلێک گەنج و پیاوی ئەم شارە شەیدای ببوون. دەوڵەمەند، بازرگان،
بەرپرس و کەسانێکی زۆر هەوڵیان بۆ دا بەڵام ئەم هێندە بە جوانییەکەی خۆی دەنازی کە
ئامادەنەبوو شوو بە کەسیان بکات. دەستەخوشکەکانی و هەندێک لە هاوڕێکانی ناویان لێ
نابوو جیهانی ناز. وەختێک بە ئاگاهاتەوە تەمەنی لە سیوپێنج لای دابوو. ئەو دەمە دڵبەست
خەزانی شاعیر گرۆدەی ببوو و کۆڵی لی نەدەدا. کاتێک رازیبوو ئەو یەک دیوان شیعری بۆ
نووسیبوو و بە چاپی گەیاندبوو.
" خێراکە کچێ! هەرچەند خۆت مژۆڵ بکەی و
سستی بنوێنی، دواجار ناتوانیت لە ئەنجامەکە خۆت بدزیتەوە. بۆیە تا درەنگتر نەبووە
بچۆ بەلای وەرگرتنەوەی ئەنجامی پشکنینەکەوە..... جا وا ئەنجامەکەیشت زانی چی
دەگۆڕێت و چ کاریگەرییەکی لەسەر چارەنووس یان هەست و سۆزت دەبێت؟" جیهان نازانێت ئەم پرسیارانە کامیان لە
مێشکییەوە هەڵدەقووڵێن و کامیشیان لە دڵییەوە. ئاخر جیاکردنەوەی پەیامەکانی مێشک و
دڵ هەروا سانا نییە. ئەو پەیامانەی هەندێکجار بروسکەئاسا وەک ئەوەی تروسکاییەک بێت لە نێو تونێلێکی نوتەکدا لە چرکەیەکدا ناخمان رۆشن دەکەنەوە و
دەربارەی کێشەگەلێکی سەخت کە چەندین رۆژبووە
مێشکمانیان گوشیووە، هەندێک شتمان پێ دەڵێن کە ئەگەر بە ئارامی لیێان رابمێنین و لێیان تێبگەین ئەوا
رەنگە لە دۆزینەوەی چارەیەکدا کۆمەکێکمان پێ بکەن. بەڵام ئایا ئەمە بۆ ژنێکی وەکو
ئەم ئاسانە کە پێراگەیاندنی هەواڵەکە چەشنی پیاکێشانی کوتەکێک بوو بە سەریدا کە تەواوی
بیرکردنەوە، سەرنج و بگرە بڕیارەکانیشی شێواندووە و لێڵی کردوون؟ دۆخی ژیانی
خێزانەکەیشی لەولاوە بوەستێت کە زیندووێتی و جۆش و خرۆشی جارانی تیا نەماوە و دەڵێیت
خۆڵی مردووی بەسەردا کراوە. خۆ هەر لەبەر شڵەژان وپەژارەی ئەمیش بوو دڵبەندی
هاوسەری پێشنیاری بۆ کرد و رازی کرد ئەم پشکنینە بکات.
هەموو شتێک لە ماوەیەکی کورتی دوو مانگیدا روویاندا. دەرکەوتنی ناڕێکی لە رۆیشتن
و لاقەکانی خولیادا و هەستپێکردنی لەلایەن ئەم و دڵبەستەوە و پاشان دەستنیشانکردنی هۆکارەکەی لە
لایەن پزیشکەکانەوە ماوەیەکی زۆر کورتی خایاند. ئەو دووچاری نەخۆشی دۆشین بووە کە
نەخۆشییەکی دەگمەنە و دەبێتە هۆی پوکانەوەی ماسوولکەکانی. سەرەتا لە پەلی دەخات و
پاشان لە دەیەی دووەمی تەمەنیدا دەیکوژێت. لەگەڵ ئەوەی پێشبینی ژیانی دوای کوڕە
تاقانەکەی بۆ ناکرێت، بەڵام تەنیا بیرکردنەوە لێی دونیای لەبەرچاو تاریک دەکات. ئەو
حەز دەکات بداتە پڕمەی گریان. خۆزگە بۆ جێیەک دەخوازێت تیایدا بە تاقی تەنێ بگری
و هاوار بکات. گریانێک ئەم لە نێو فرمێسکەکانیدا نوقم بکات. هاوارێکیش هەتا لای تەختی
یەزدان بچێت. خۆ سوور دەشزانێت نە گریان و نە دادوفیغان هیچ لە دۆخەکە ناگۆڕن. سەرێک
بۆ ئاسمان هەڵدەبڕێت. لەگەڵ ئەوەی باڵەخانە بەرزەکان خۆرەکەیان شاردۆتەوە بەڵام مەزەندە
دەکات خۆر ئێستا لە ئەنگۆرەدا بە قەد تۆپێکی پرتەقاڵی لێ مابێتەوە. دڵبەست بەردەوام وێڕای دڵتەنگییەکەی خۆی دڵی
ئەمیش دەداتەوە و قسەی پزیشکەکەی بیر دەخاتەوە (ئەگەری هەیە کوڕەکەتان هەتا بیست
ساڵی تریش بژیێت) بەردەوام دەبێت و بە خەندەیەکی خەمناکانەوە دەڵێت( ئێ هەتا ئەو
کاتەش من و تۆ نامێنین.. خۆ مرۆڤی ئەم وڵاتە بە زۆری ناگەنە هەفتا ساڵی دەمرن)
(تکایە ئەنجامەکەم پێ مەڵێ. نە بە خۆم و نە
بە هاوسەرم. با کەسمان نەیزانین.. ئەو کاغەزە بدڕێنە و نهێنییەکەیشی با هەر لای
خۆت بێت. هەوڵیش دەدەم جارێکی تر چاوم پێت نەکەوێت).
